اسلا م آباد (نیوز ڈیسک) برطانیہ کے شہر لندن میں واقع وہ تاریخی رہائش گاہ، جہاں پاکستان کے سابق وزیراعظم عمران خان اپنی سابقہ اہلیہ جمائمہ خان اور ان کے اہلِ خانہ کے ساتھ کئی برس مقیم رہے،

فروخت کے لیے مارکیٹ میں پیش کر دی گئی ہے۔غیر ملکی ذرائع ابلاغ کے مطابق “اورملی لاج” نامی اس لگژری جائیداد کی قیمت 2 کروڑ 50 لاکھ برطانوی پاؤنڈ مقرر کی گئی ہے۔ یہ شاندار رہائش گاہ لندن کے جنوب مغربی علاقے رچمنڈ میں ہیم کامن کے قریب واقع ہے، جبکہ معروف رچمنڈ پارک بھی اس سے مختصر فاصلے پر موجود ہے۔جائیداد کی تفصیلات کے مطابق یہ عمارت جارجین دور کے ابتدائی زمانے میں تعمیر کی گئی تھی اور اس کا مجموعی رقبہ تقریباً 15 ہزار 814 مربع فٹ پر مشتمل ہے۔اس تاریخی گھر میں 10 کشادہ بیڈ رومز، 7 باتھ رومز، خوبصورت سرسبز باغات اور ایک علیحدہ کاٹیج بھی موجود ہے، جو اسے لندن کی نمایاں اور قیمتی رہائشی املاک میں شامل کرتا ہے۔