اسلا م آباد (نیوز ڈیسک)پاکستان انٹرنیشنل ایئرلائنز (پی آئی اے) نے ایتھوپین ایئرلائنز کے سابق سربراہ تولدے گیبریماریم کو ادارے کا نیا چیف ایگزیکٹو آفیسر (سی ای او) مقرر کرنے کا فیصلہ کر لیا ہے۔

دو باخبر ذرائع نے اس تقرری کی تصدیق کی ہے، تاہم کمپنی کی جانب سے تاحال باضابطہ اعلان نہیں کیا گیا۔ذرائع کے مطابق نئی تقرری ایسے مرحلے پر کی گئی ہے جب پی آئی اے نجکاری کے بعد اپنے انتظامی ڈھانچے کو مضبوط بنانے اور آپریشنز کو بہتر بنانے کی کوششوں میں مصروف ہے۔تولدے گیبریماریم کو عالمی فضائی صنعت میں ایک تجربہ کار منتظم تصور کیا جاتا ہے۔ ان کی قیادت میں ایتھوپین ایئرلائنز نے نمایاں ترقی کی، افریقہ کی سب سے بڑی فضائی کمپنی کا اعزاز حاصل کیا اور ادیس ابابا کو اہم بین الاقوامی ٹرانزٹ مرکز کے طور پر فروغ دیا۔اطلاعات کے مطابق ان کی شمولیت سے عارف حبیب گروپ کی سربراہی میں قائم کنسورشیم کو پی آئی اے کی تنظیم نو اور بحالی کے منصوبے میں مزید تقویت ملنے کی توقع ہے۔ واضح رہے کہ نجکاری سے قبل قومی ایئرلائن کئی برسوں کے دوران تقریباً 2.8 ارب ڈالر سے زائد کے مالی خسارے کا سامنا کر چکی تھی۔عارف حبیب گروپ کے چیئرمین عارف حبیب سے اس حوالے سے رابطہ کیا گیا، تاہم ان کی جانب سے کوئی باضابطہ مؤقف سامنے نہیں آیا۔پی آئی اے کے ایک سینئر عہدیدار نے نام ظاہر نہ کرنے کی شرط پر بتایا کہ تولدے گیبریماریم کی تقرری کا فیصلہ کیا جا چکا ہے،

لیکن ان کے نام کا سرکاری اعلان تمام سکیورٹی کلیئرنس مکمل ہونے کے بعد کیا جائے گا۔دوسری جانب پی آئی اے کے ایک بڑے شیئر ہولڈر نے بھی اس تقرری کی تصدیق کرتے ہوئے کہا کہ تولدے گیبریماریم ایک تجربہ کار اور کامیاب منتظم ہیں، جنہوں نے ماضی میں مختلف اداروں کی بحالی میں اہم کردار ادا کیا ہے۔یہ پیش رفت حکومت پاکستان کی جانب سے گزشتہ ہفتے پاکستان انٹرنیشنل ایئرلائنز کارپوریشن لمیٹڈ (PIACL) کی نجکاری کے پہلے مرحلے کی تکمیل کے اعلان کے بعد سامنے آئی ہے۔