اسلام آباد (نیوز ڈیسک) بیرونِ ملک مقیم پاکستانی مختلف شعبوں میں اپنی صلاحیتوں کے ذریعے نہ صرف اپنی شناخت قائم کر رہے ہیں بلکہ پاکستان کا نام بھی روشن کر رہے ہیں۔ اسی سلسلے میں ایک اور نمایاں کامیابی پاکستانی طالبہ بسمہ سہیل نے حاصل کی ہے۔

شارجہ برٹش انٹرنیشنل اسکول کی طالبہ بسمہ سہیل نے اے لیول کے امتحانات میں 97.8 فیصد نمبر حاصل کرکے غیر معمولی کارکردگی کا مظاہرہ کیا ہے۔ ان کی اس شاندار کامیابی نے انہیں اپنے ادارے کی ممتاز طالبات میں شامل کر دیا ہے۔

بسمہ سہیل کا تعلق پاکستان کے شہر سیالکوٹ سے ہے۔ وہ پاکستان مسلم لیگ (ن) دبئی کے صدر اور معروف قانون دان سہیل عامر گھمن ایڈووکیٹ کی صاحبزادی ہیں۔

امتحانات میں نمایاں کامیابی کے بعد متحدہ عرب امارات کی حکومت کی جانب سے بسمہ سہیل کو ’’گولڈن ویزا‘‘ کی پیشکش بھی کی گئی ہے، جو اعلیٰ کارکردگی کا اعتراف سمجھا جاتا ہے۔

اپنی کامیابی پر اظہارِ خیال کرتے ہوئے بسمہ سہیل نے کہا کہ یہ کامیابی اللہ تعالیٰ کے فضل، والدین کی دعاؤں اور اساتذہ کی محنت کا نتیجہ ہے۔ انہوں نے بتایا کہ ان کا مستقبل میں آرکیٹیکٹ انجینئر بننے کا ارادہ ہے اور وہ مزید اعلیٰ تعلیم حاصل کرنا چاہتی ہیں۔

بسمہ سہیل کی اس کامیابی پر متحدہ عرب امارات میں مقیم پاکستانی کمیونٹی، مسلم لیگ (ن) یو اے ای کے عہدیداران، کارکنان، دوست احباب اور اہلِ خانہ نے سہیل عامر گھمن کو مبارکباد پیش کی ہے۔ مختلف سماجی اور سیاسی شخصیات نے بسمہ سہیل کے روشن مستقبل کے لیے نیک تمناؤں اور دعاؤں کا اظہار بھی کیا ہے۔