اسلام آباد (نیوز ڈیسک) لاہور کے علاقے ڈیفنس میں 18 سالہ لڑکی کے ساتھ مبینہ زیادتی کے الزام میں اس کے سوتیلے والد کو گرفتار کر لیا گیا ہے۔
پولیس نے واقعے کا مقدمہ درج کرکے مزید تحقیقات شروع کر دی ہیں۔ایس پی کینٹ اختر نواز کے مطابق اطلاع موصول ہوتے ہی فوری کارروائی کا حکم دیا گیا، جس پر ایس ایچ او ڈیفنس اے محمد افضال نے پولیس ٹیم کے ہمراہ کارروائی کرتے ہوئے ملزم محمد شاکر کو حراست میں لے لیا۔
پولیس کا کہنا ہے کہ ملزم متاثرہ لڑکی کو روحانی علاج (دم) کروانے کے بہانے ایک نجی ہوٹل لے گیا، جہاں اس پر مبینہ طور پر زیادتی کا الزام ہے۔ الزام کے مطابق ملزم نے متاثرہ کو واقعہ کسی کے سامنے بیان کرنے کی صورت میں سنگین نتائج کی دھمکیاں بھی دیں۔
حکام کے مطابق متاثرہ لڑکی کی والدہ کی درخواست پر ملزم کے خلاف مقدمہ درج کر لیا گیا ہے۔ کیس کی حساس نوعیت کے پیش نظر تفتیش جینڈر سیل کے سپرد کر دی گئی ہے تاکہ تمام پہلوؤں کا تفصیلی جائزہ لیا جا سکے۔
ایس پی کینٹ نے بروقت کارروائی پر متعلقہ پولیس افسران اور ٹیم کی کارکردگی کو سراہتے ہوئے کہا کہ خواتین اور بچوں کے خلاف جرائم میں ملوث افراد کے ساتھ قانون کے مطابق سختی سے نمٹا جائے گا اور انصاف کی فراہمی یقینی بنائی جائے گی۔
