اسلام آباد (نیوز ڈ یسک) پنجاب کے سرکاری اسکولوں میں مفت درسی کتب کی فراہمی کو مؤثر بنانے کے لیے محکمہ تعلیم نے نئے طریقہ کار کی منظوری دے دی ہے۔

نئے تعلیمی سال کے آغاز سے پہلے طلباء تک کتابوں کی بروقت ترسیل یقینی بنانے کے احکامات جاری کر دیے گئے ہیں۔محکمہ تعلیم کی جانب سے جاری منصوبے کے مطابق مختلف جماعتوں کے لیے نئی اور پرانی کتابوں کی تقسیم کا الگ نظام متعارف کرایا گیا ہے۔ پہلی سے تیسری جماعت تک تمام طلباء کو مکمل طور پر نئی کتابیں فراہم کی جائیں گی، جبکہ چوتھی اور پانچویں جماعت کے 80 فیصد طلباء نئی کتب حاصل کر سکیں گے۔ اسی طرح چھٹی سے دسویں جماعت تک نصف طلباء کو نئی کتابیں دی جائیں گی۔دسویں جماعت کے نصاب میں تبدیلی کے باعث اس کلاس کے تمام طلباء کو سو فیصد نئی کتابیں فراہم کرنے کا فیصلہ کیا گیا ہے۔ باقی طلباء کے لیے “بک بینک” اسکیم کے تحت قابلِ استعمال پرانی کتابیں مہیا کی جائیں گی، جو سابق طلباء سے جمع کی جائیں گی۔

اس مقصد کے لیے اسکول انتظامیہ کو ہدایت دی گئی ہے کہ تعلیمی سال مکمل کرنے والے طلباء سے کتابیں واپس لے کر محفوظ کی جائیں تاکہ ضرورت مند بچوں کو دوبارہ فراہم کی جا سکیں۔حکام کے مطابق پنجاب کے مختلف اضلاع اور تحصیلوں کے ویئر ہاؤسز میں نئی درسی کتب پہنچا دی گئی ہیں۔ کتابوں کی تقسیم طلباء کی تازہ انرولمنٹ کے مطابق کی جائے گی تاکہ ہر طالب علم تک مقررہ وقت پر کتابیں پہنچ سکیں۔محکمہ تعلیم نے متعلقہ افسران کو شفاف اور منصفانہ تقسیم یقینی بنانے کی سخت تاکید کی ہے تاکہ کسی بھی بچے کی تعلیم متاثر نہ ہو۔