اسلام آباد (نیوز ڈ یسک) ایران کے وزیر خارجہ عباس عراقچی کی سربراہی میں ایک اعلیٰ سطحی وفد اسلام آباد پہنچ گیا ہے،
جہاں ان کا پرتپاک استقبال کیا گیا۔ترجمان دفتر خارجہ کے مطابق وفد کا خیرمقدم نائب وزیراعظم و وزیر خارجہ اسحاق ڈار، چیف آف آرمی اسٹاف و چیف آف ڈیفنس فورسز عاصم منیر، وزیر داخلہ محسن نقوی اور دیگر اعلیٰ حکام نے کیا۔دورے کے دوران ایرانی وزیر خارجہ پاکستان کی سیاسی و عسکری قیادت سے اہم ملاقاتیں کریں گے، جن میں خطے کی موجودہ صورتحال اور امن و استحکام کے لیے مشترکہ کوششوں پر بات چیت متوقع ہے۔اس مرتبہ ایک نمایاں پہلو یہ بھی رہا کہ استقبال کے موقع پر فیلڈ مارشل عاصم منیر سویلین لباس میں نظر آئے۔
اس سے قبل جب مذاکرات کے پہلے مرحلے کے لیے ایرانی وفد پاکستان آیا تھا تو وہ فوجی وردی میں موجود تھے، جبکہ امریکی وفد کے استقبال کے دوران بھی انہوں نے سادہ لباس پہن رکھا تھا۔ ان کے لباس کے انتخاب پر سوشل میڈیا پر مختلف تبصرے کیے جا رہے ہیں۔
