اسلام آباد (این این آئی)سپریم کورٹ آف پاکستان نے باپ کو قتل کرنے والے ملزم محمد صفدر کی سزا معافی کے کیس میں کہا ہے کہ 8 اپریل کو ایسا فیصلہ دیں گے

جو پاکستان کو ہلا کر رکھ دے گا۔سپریم کورٹ میں باپ کو قتل کرنے والے ملزم محمد صفدر کی سزا معافی کے کیس کی سماعت جسٹس ہاشم کاکڑ کی سربراہی میں تین رکنی بینچ نے کی۔سماعت کے دوران وکیل مجرم نے موقف اختیار کیا کہ میرا موکل 14 سال سے قید میں ہے، جسٹس ہاشم کاکڑ نے کہا کہ باپ کو مارنے والے کو 24 سال قید بھی کم ہے، جبکہ جسٹس اشتیاق ابراہیم نے کہا کہ “قصاص یا دیت کے تحت معافی ممکن ہے مگر ایسے کیسز کا کوئی حل نکالنا ہوگا۔جسٹس ہاشم کاکڑ نے کہا کہ اس کیس میں فیصلہ دے کر کوئی راستہ نکالنا ہوگا اور اس طرح کے کیسز کے حل کے لیے کوئی اہم فیصلہ دینا چاہیے۔جسٹس اشتیاق ابراہیم نے کہا کہ والد کو مارنے والے کو کم از کم کلین چٹ تو نہیں ملنی چاہیے۔جسٹس ہاشم کاکڑ نے کہا کہ ہم 8 اپریل کو اس پر کوئی فیصلہ دیں گے، ایسا فیصلہ دیں گے جو پاکستان کو ہلا کر رکھ دے گا۔