نئی دہلی (این این آئی)سابق بھارتی کپتان روہت شرما نے اپنی ٹیم کو پاک بھارت ٹاکرے سے پہلے خبردار کر دیا۔

روہت شرما سے ایک تقریب کے دوران یہ سوال پوچھا گیا کہ ٹی 20 کرکٹ میں کامیابی کو یقینی بنانا کتنا مشکل ہے کیونکہ صرف اس بات کو جان کر کوئی ٹیم ہمت تو نہیں ہار سکتی کہ بھارتی ٹیم اس بار ٹورنامنٹ جیتنے کیلئے فیورٹ ہے؟انہوں نے اس سوال کا جواب دیتے ہوئے کہا کہ سب سے پہلے تو یہ واضح کر دوں کہ میں نے کبھی اس بات پر یقین نہیں کیا کہ ٹورنامنٹ میں کوئی ٹیم فیورٹ ہوتی ہے۔بھارتی کرکٹر نے کہا کہ یہ ایک مضحکہ خیز کھیل ہے اور ہم نے دیکھا ہے کہ بین الاقوامی کرکٹ کے پچھلے 10 سال میں بہت کچھ ہوا ہے۔انہوں نے کہا کہ تمام کرکٹ ٹیمز کے پاس اب ٹی 20 کرکٹ کھیلنے کا اتنا زیادہ تجربہ ہے کہ آپ صرف گرائونڈ میں جا کر یہ نہیں سوچ سکتے کہ یہ ہمارے لیے 2 نکاتی فتح ہے بلکہ ان 2 پوائنٹس کو حاصل کرنے کے لیے میچ کے دوران اچھی کرکٹ کھیلنی ہو گی ورنہ خالی ہاتھ گھر جانا پڑ سکتا ہے۔روہت شرما نے کہا کہ ماضی میں کیا ہوا ہے، اسے بھول جائیں بلکہ اس بات پر دھیان دیں کہ ابھی ٹیم کی صورتِ حال کیسی ہے، کھلاڑی فارم میں ہیں یا نہیں ہیں اور جو میچ اب ہونے والا ہے، اس میں اچھا کھیلنا ہے کیونکہ ٹورنامنٹ میں موجود ہر ٹیم کسی بھی ٹیم کو ہرانے کی صلاحیت رکھتی ہے۔

واضح رہے کہ پاکستان اور بھارت کے درمیان میچ اتوار کو کولمبو میں شیڈول ہے ۔