اسلام آباد (نیوز ڈیسک)سپریم کورٹ کی ہدایت پر ہونے والی ملاقات کے بعد بیرسٹر سلمان صفدر نے اڈیالہ جیل میں سابق وزیراعظم عمران خان کے سیل کے معائنے سے متعلق اپنی رپورٹ جاری کر دی،
جس میں انہوں نے اندر موجود سہولیات اور صورتحال کی تفصیلات بیان کی ہیں۔رپورٹ کے مطابق سیل کی دیوار پر ایک ٹی وی نصب تھا، تاہم جب اسے چلانے کی درخواست کی گئی تو معلوم ہوا کہ وہ خراب ہے اور کام نہیں کر رہا۔ کمرے میں الماری موجود نہیں تھی، جس کے باعث عمران خان کے زیادہ تر کپڑے پانچ ہینگرز پر لٹکے ہوئے تھے۔ معائنے کے دوران وہاں رکھی کرسی غیر آرام دہ محسوس ہوئی، جبکہ بستر میں سنگل میٹریس، چار تکیے اور دو کمبل شامل تھے۔ بیڈ کے نیچے پانچ جوڑے جوتے اور اسپورٹس شوز رکھے ہوئے تھے اور فرش پر سرمئی رنگ کی چٹائی بچھی ہوئی تھی۔مزید مشاہدے میں ان کی ذاتی اشیاء بھی نظر آئیں جن میں جائے نماز، تسبیح، دو تولیے، ٹشو پیپر، ماؤتھ واش، ایئر فریشنر، شیونگ جیل اور شیو کرنے کا سامان شامل تھا۔ ایک میز پر تقریباً سو کتابیں رکھی تھیں جبکہ دو سیب لپٹے ہوئے حالت میں موجود تھے۔ سیل میں ورزش کے لیے دو ڈمبل بھی رکھے تھے۔رپورٹ کے مطابق کمرے کے اندر تقریباً ساڑھے چار فٹ ضرب ساڑھے چار فٹ کا بیت الخلاء موجود تھا جسے پانچ فٹ اونچی دیوار سے الگ کیا گیا ہے اور اس پر چھت نہیں تھی۔ اس کے باہر ایک واش بیسن نصب تھا جس میں گرم اور ٹھنڈے پانی کی سہولت دستیاب تھی اور ساتھ آئینہ بھی لگا ہوا تھا۔
صفائی کے حوالے سے بیت الخلاء کی حالت میں مزید بہتری کی ضرورت محسوس کی گئی۔ہواداری کے لیے سیل میں چھت کے مخالف سمتوں پر تقریباً دو ضرب دو فٹ کے دو روشن دان موجود تھے جو کراس وینٹیلیشن فراہم کرتے ہیں، تاہم اندرونی بیت الخلاء کے باوجود کوئی ایگزاسٹ سسٹم نصب نہیں پایا گیا۔
