لاہور: پاکستان مسلم لیگ (ن) کے قائد میاں نواز شریف نے کہا ہے کہ عمران خان کے اعمال کے پیچھے وہ طاقتیں بھی شامل تھیں جنہوں نے اسے آگے لانے میں کردار ادا کیا، اس لیے صرف عمران خان نہیں بلکہ اسے لانے والوں کا بھی احتساب ہونا چاہیے۔نومنتخب ارکانِ اسمبلی سے خطاب کرتے ہوئے نواز شریف نے کہا کہ تحریک انصاف کے دورِ حکومت میں ملک کو شدید نقصان پہنچا، بدتمیزی کو فروغ دیا گیا اور ملکی معیشت دیوالیہ ہونے کے قریب پہنچ گئی۔ ان کا کہنا تھا کہ پی ٹی آئی نے مہنگائی کو 39 فیصد تک پہنچایا، جب کہ مسلم لیگ (ن) کے دور میں مہنگائی صرف تین فیصد رہی۔ اگر ترقی کا سفر نہ رکتا تو آج پاکستان کہیں بہتر مقام پر ہوتا اور آئی ایم ایف کی فکر بھی نہ ہوتی۔
انہوں نے مزید کہا کہ 2018 سے 2022 تک پیش آنے والی تمام تباہی کی ذمہ دار پی ٹی آئی ہے، کیونکہ اسی دور میں جھوٹ، نفرت اور انتشار کی سیاست کو فروغ ملا۔ ایسے ماحول میں ملک کیسے ترقی کر سکتا تھا؟ ان کے مطابق اس دور میں میرٹ کی کھلم کھلا خلاف ورزی کی گئی۔
ضمنی انتخابات کا ذکر کرتے ہوئے نواز شریف نے کہا کہ پی ٹی آئی نے بائیکاٹ کا اعلان تو کیا، مگر اسی کے رہنما عمر ایوب کی اہلیہ الیکشن میں حصہ لے رہی تھیں۔ عوام نے جھوٹ اور نفرت کی سیاست کو مسترد کر کے واضح پیغام دیا۔ انہوں نے کامیاب ہونے والے ارکان کو مبارک باد دی اور کہا کہ گالم گلوچ اور فتنہ پھیلانے والی سیاست کو شکست ہوئی ہے۔
آخر میں انہوں نے کہا کہ آج ملک میں میرٹ پر فیصلے ہو رہے ہیں، ترقیاتی منصوبے جاری ہیں، لیپ ٹاپ تقسیم ہو رہے ہیں، سڑکوں کی تعمیر ہو رہی ہے، گرین بسیں چل رہی ہیں، امن و امان بہتر ہو رہا ہے اور بغیر کسی امتیاز کے راشن کارڈ دیے جا رہے ہیں۔ مزید عوامی منصوبے بھی جلد سامنے آئیں گے۔
