اسلام آباد (نیوزڈ یسک) اپوزیشن اتحاد نے مجوزہ 27ویں آئینی ترمیم کے خلاف ملک گیر احتجاجی تحریک شروع کرنے کا اعلان کر دیا۔ تحریک کا اعلان اپوزیشن اتحاد کے سربراہ محمود خان اچکزئی اور علامہ راجہ ناصر عباس نے مشترکہ پریس کانفرنس میں کیا۔میڈیا سے گفتگو کرتے ہوئے محمود خان اچکزئی نے کہا کہ آئین ریاست اور عوام کے درمیان ایک عمرانی معاہدہ ہے، اور انہوں نے پانچ مرتبہ آئین کے تحفظ کا حلف اٹھایا ہے۔ ان کا کہنا تھا کہ موجودہ حالات میں عوام کی رائے کو نظرانداز کیا جا رہا ہے، اس لیے ہم نے فیصلہ کیا ہے کہ اب عوام کے پاس جائیں گے۔

انہوں نے مزید کہا کہ آئین کی بنیادوں کو متزلزل کرنے کی کوشش کی جا رہی ہے، لہٰذا اب تحریک کے سوا کوئی راستہ باقی نہیں بچا۔ ان کے مطابق، تحریک کا آغاز آج رات سے کیا جائے گا۔محمود خان اچکزئی نے اعلان کیا کہ تحریک کے تین بنیادی نعرے ہوں گے:جمہوریت زندہ باد، آمریت مردہ بادسیاسی قیدیوں کی رہائیعوامی حاکمیت اور آئین کی بالادستیانہوں نے کہا کہ اپوزیشن اتحاد عوام کو یہ پیغام دے گا کہ طاقت کا اصل سرچشمہ پارلیمنٹ اور عوام ہیں، اور آئین ہی سب پر بالادست ہے۔

اس موقع پر علامہ راجہ ناصر عباس نے کہا کہ قوم کو 27ویں آئینی ترمیم کے خلاف کھڑا ہونا ہوگا کیونکہ یہ ترمیم جمہوری اداروں کو کمزور اور طاقتور حلقوں کو مزید بااختیار بناتی ہے۔ انہوں نے کہا کہ پاکستان میں جمہوری ڈھانچہ مفلوج ہو چکا ہے، اور اب وقت آگیا ہے کہ عوام اپنے حقوق کے تحفظ کے لیے میدان میں آئیں۔