اسلام آباد(این این آئی)وفاقی وزیر منصوبہ بندی و ترقی احسن اقبال نے انکشاف کیا ہے کہ بانی پی ٹی آئی جس سیل میں قید ہیں، عمران خان کے دورحکومت میں مجھے بھی اسی سیل میں رکھا گیا تھا۔نجی ٹی وی پروگرام میں گفتگوکرتے ہوئے احسن اقبال نے کہا کہ اللہ تعالی کی لاٹھی کیسی ہوتی ہے، آج عمران خان اڈیالہ جیل کے جس سیل کے اندر ہیں اور جس کو وہ اتنا ڈرانا بنا کر پیش کرتے ہیں کہ سزائے موت کے قیدیوں کی چکی ہے، یہ وہی سیل ہے جس میں انہوں نے مجھے بند رکھا تھا۔
احسن اقبال نے بتایاکہ یہ ایک عام لمبا سا سیل ہے، جس کے آگے دیوار ہوتی ہے، اس کے پیچھے واش روم بھی اندر ہی ہوتا ہے جبکہ سیل میں ایک چارپائی آ جاتی ہے، اس کے سامنے ایک چھوٹا سا برآمدہ ہے جہاں واک کر لیتے ہیں۔انہوںنے کہاکہ عمران خان کو کولرکی سہولت میسرہے،جومجھے نہیں تھی،سردی میں سیل کا ٹمپریچر رات کو پانچ ڈگری ہوجاتا تھا،بانی کو ٹی وی کی سہولت موجود،مجھے نہیں تھی۔
