نئی دہلی (نیوز ڈیسک) — افغانستان کے وزیرِ خارجہ امیر خان متقی نے کہا ہے کہ افغانستان میں ہونے والے حالیہ دھماکے پاکستان کی غلطی کا نتیجہ ہیں۔بھارت کے دورے کے دوران صحافیوں سے گفتگو میں امیر خان متقی نے بتایا کہ دھماکوں کے نتیجے میں کسی جانی نقصان کی اطلاع موصول نہیں ہوئی۔

افغان حکومت کی جانب سے جاری ایک بیان میں کہا گیا کہ وہ پاکستان کی جانب سے ڈیورنڈ لائن کے قریب کی گئی بمباری کی سخت مذمت کرتے ہیں۔واضح رہے کہ افغان وزیر خارجہ اس وقت بھارت کے سرکاری دورے پر ہیں، جہاں انہوں نے بھارتی وزیرِ خارجہ ایس جے شنکر سے ملاقات بھی کی۔ اس ملاقات میں بھارت نے افغانستان میں اپنے تکنیکی مشن کو سفارت خانے کا درجہ دینے کا اعلان کیا۔ملاقات کے دوران بھارتی وزیرِ خارجہ نے افغانستان کے لیے ایمبولینسز کا تحفہ بھی پیش کیا۔ انہوں نے امیر خان متقی کو ان ایمبولینسز کا جائزہ کروایا اور 20 میں سے 5 ایمبولینسز فوری طور پر افغان وفد کے حوالے کیں۔