سیول (این این آئی)جنوبی کوریا کے معروف اداکار سونگ یونگ کیو( Song Young-Kyu) کی لاش گاڑی سے برآمد ہوئی ہے۔غیر ملکی میڈیا کے مطابق جنوبی کورین اداکار سونگ یونگ کیو جنوبی سیول کے علاقے یونگ اِن میں ایک پارک شدہ کار کے اندر مردہ حالت میں پائے گئے۔ یہ افسوسناک واقعہ ایسے وقت میں پیش آیا جب جون میں 55 سالہ سونگ یونگ کو شراب پی کر گاڑی چلانے کے مقدمے میں گرفتار کیا گیا تھا۔مقامی ذرائع کے مطابق اداکار کو ایک پارک شدہ کار میں مردہ پایا گیا جس کے بعد شہریوں نے فوری طور پر حکام کو اطلاع دی۔

ان کی موت کی وجہ تاحال معلوم نہیں ہو سکی۔رپورٹس کے مطابق اداکار کو 19 جون کو ڈرنک اینڈ ڈرائیو کیس میں گرفتار کیا گیا تھا۔وہ مبینہ طور پر نشے کی حالت میں تقریبا 5 کلومیٹر تک گاڑی چلاتے رہے جو کہ جنوبی کوریا کے قانون کے مطابق ڈرائیونگ لائسنس منسوخ کرنے کے لیے کافی ہوتا ہے۔اس واقعے کے بعد انہیں بغیر حراست کے پراسیکیوشن کے حوالے کر دیا گیا تھا۔ تنازع کے بعد اداکار کو کئی پراجیکٹس سے بھی نکال دیا گیا تھا۔کورین اداکار کے انتقال کے بعد ان کے اہلِ خانہ کی جانب سے تاحال کوئی باضابطہ بیان جاری نہیں کیا گیا۔