اسلام آباد (نیوز ڈیسک)کراچی ڈیفنس فیز 6 کے ایک فلیٹ سے مردہ حالت میں ملنے والی اداکارہ حمیرا اصغر سے متعلق ان کے ساتھ کام کرنے والے اسٹائلسٹ دانش مقصود نے کچھ اہم تفصیلات شیئر کی ہیں۔جیو ڈیجیٹل سے بات کرتے ہوئے دانش مقصود نے بتایا کہ ان کی حمیرا سے آخری بار بات چیت اکتوبر 2023 میں ایک فوٹو شوٹ کے سلسلے میں ہوئی تھی۔ انہوں نے بتایا کہ گفتگو کے دوران اداکارہ خوش دکھائی دیں اور شوٹ کو بھی سراہا۔دانش کے مطابق، بعد ازاں ان کی ٹیم نے اس فوٹو شوٹ سے متعلق سوشل میڈیا پر کولیبریشن کی درخواست بھیجی، مگر اداکارہ کی جانب سے اس کا کوئی جواب نہیں آیا۔

اس کے بعد متعدد بار فون کالز اور واٹس ایپ پیغامات بھیجے گئے، تاہم کوئی ردعمل موصول نہ ہوا۔انہوں نے مزید بتایا کہ مسلسل خاموشی پر تشویش لاحق ہوئی تو انہوں نے کچھ آن لائن پلیٹ فارمز سے رابطہ کر کے حمیرا کے لاپتہ ہونے کی اطلاع دی، لیکن ان کی بات کو سنجیدہ نہیں لیا گیا۔دانش کا کہنا تھا کہ دو مختلف سوشل میڈیا پیجز پر انہوں نے یہ خبر لگوائی، مگر شوبز انڈسٹری کی جانب سے کوئی خاص توجہ نہیں دی گئی۔یاد رہے کہ حال ہی میں اداکارہ حمیرا اصغر کی کئی دن پرانی لاش ان کے فلیٹ سے ملی۔ وہ لاہور سے تعلق رکھتی تھیں، لیکن کراچی میں رہائش پذیر تھیں۔ پولیس کے مطابق اداکارہ نے 2018 میں یہ فلیٹ کرائے پر لیا تھا اور گزشتہ کچھ عرصے سے کرایہ ادا نہیں کر رہی تھیں، جس پر فلیٹ کے مالک نے قانونی کارروائی شروع کی تھی۔ عدالتی حکم پر جب عملدرآمد کے لیے بیلف پہنچا تو دروازہ بند پایا گیا۔ پولیس نے دروازہ توڑ کر اندر داخل ہو کر لاش برآمد کی۔پولیس نے فلیٹ کو سیل کر کے تحقیقات کا آغاز کر دیا ہے، جب کہ حمیرا کی موت کی وجوہات جاننے کے لیے مختلف زاویوں سے جائزہ لیا جا رہا ہے۔