ممبئی(این این آئی)مداحوں اور خیرخواہوں کی جانب سے تیزی سے کم ہوتے وزن پر تشویش کے اظہار کے بعد کرن جوہر نے خاموشی توڑ دی۔بھارتی میڈیا کے مطابق انسٹاگرام لائیو سیشن کے دوران کرن جوہر نے بتایا کہ میں بالکل صحت مند ہوں اور خود کو پہلے سے کہیں زیادہ بہتر محسوس کر رہا ہوں۔کرن نے بتایا کہ انہیں وزن کم کرنے کی ضرورت اس وقت محسوس ہوئی جب ان کے بلڈ ٹیسٹ میں کچھ چیزوں کو درست کرنے کی ضرورت ظاہر ہوئی۔تاہم کرن جوہر نے یہ نہیں بتایا کہ وہ خون میں کس چیز کی مقدار کو درست کرنے کی بات کر رہے ہیں۔
کرن جوہر نے انکشاف کیا کہ وہ اس وقت دوا پر بھی ہیں لیکن ان کا وزن روزانہ صرف ایک وقت کھانا کھانے کی وجہ سے کم ہوا ہے۔کرن جوہر نے بتایا کہ اپنی فٹنس کو برقرار رکھنے کیلئے پیڈل بال کھیلنا اور تیراکی بھی جاری رکھے ہوئے ہیں۔فلم ساز کرن جوہر نے کہا کہ وزن کی یہ تبدیلی بہتر صحت کے مقاصد کے حصول کیلئے ہے اور یہ ہدف صحت مند طریق سے حاصل کیا ہے۔
انہوں نے مداحوں کو مشورہ دیا کہ صحت مند غذا کھائیں صرف اتنا کھائیں جتنا ضروری ہو اور لالچ میں نہ آئیں،اچھی غذا، ورزش، اور خود کو بہتر رکھنے کی کوشش کریں۔جب ایک رپورٹر نے ان سے ان کے روٹین کے بارے میں پوچھا تو کرن نے کہا کہ اگر میں یہ سب بتا دوں گا تو میرا راز کھل جائے گا اور اب واقعی راز سب کے سامنے آ چکا ہے۔
