کوہاٹ(این این آئی)کرک شہر کے قریب انڈس ہائی وے پر ٹریفک کے المناک حادثہ میں ماں بیٹی سمیت 10 مسافر لقمہ اجل بن گئے جبکہ 8 دیگر شدید زخمی ہوگئے۔ حادثہ بدھ کے روز کرک کی حدود میں انڈس ہائی وے پر لکی غنڈکی کے قریب پیش آیا جہاں شمالی وزیرستان کے ضلعی صدر میران شاہ سے پشاور جانے والی مسافر کوچ نمبر TE 548 مخالف سمت سے آنے والی منی کنٹینر نمبر 6303 سے ٹکراگئی۔

حادثہ اتنا شدید تھا کہ کوچ کا اگلا حصہ منی کنٹینر کے نیچے آگیا جس کے نتیجے میں کئی مسافر جاں بحق اور زخمی ہوکر پھنس گئے اور علاقہ قیامت صغری کا منظر پیش کرنے لگا۔ حادثہ کی اطلاع ملتے ہی پولیس اور ریسکیو 1122 کے اہلکار اور مقامی افراد جائے وقوعہ پہنچ گئے اور امدادی کارروائیاں شروع کیں ۔ پھنسے افراد کو نکالنے کے لئے بھاری مشینری پہنچادی گئی۔

ریسکیو کی میڈیکل ٹیموں نے جاں بحق اور زخمیوں کو ڈسٹرکٹ ہیڈ کوارٹر ہسپتال کرک پہنچادیا۔ ابتدائی اطلاعات اور ذرائع کے مطابق حادثہ میں جان بحق ہونے والوں میں ماں اور بیٹی سمیت 10 افراد موقع پر جاں بحق اور 8 دیگر شدید زخمی ہوگئے۔ ریسکیو 1122کے مقامی سربراہ عاطف سردار کے مطابق چھ افراد کی شناخت ہوگئی ہے جن میں کوچ ڈرائیور نیک ولی، نسیم اللہ، پیر محمد ، بصیر اللہ اور مستی خان شامل ہیں۔ بتایا جاتا ہے کہ تین شدید زخمیوں کو تشویشناک حالت میں پشاور منتقل کردیا گیا۔