کراچی(این این آئی)پی آئی اے نے برطانیہ کے بڑے شہروں کیلئے پروازوں کا منصوبہ فائنل کرلیا جبکہ برطانوی ایئرسیفٹی پابندی ہٹانے سے متعلق اپنے فیصلے سے چند روز میں آگاہ کرے گی۔تفصیلات کے مطابق برطانوی ایئر سیفٹی کمیٹی کے اجلاس میں پی آئی اے سمیت تمام پاکستانی ائیرلائنز کے متعلق غور کیا گیا۔
اجلاس کے حوالے سے بتایا گیا کہ برطانوی ائیرسیفٹی کمیٹی آئندہ چند روز میں پاکستانی ائیرلائنز کے متعلق فیصلے سے پاکستان سول ایوی ایشن کو تحریری طور آگاہ کرے گی۔پی آئی اے 5سال سے لگی پابندی ہٹنے کی صورت میں فوری طور پر برطانیہ کیلئے اپنی پروازوں کا آپریشن شروع کرے گی۔ذرائع نے بتایاکہ پی آئی اے لندن مانچسٹر اور برمنگھم کیلئے فلائٹ آپریشن پلان فائنل کرلیا ہے۔
