اسلام آباد (نیوز ڈیسک) پنجاب کے ضلع گجرات کے ایک گاؤں میں ناخلف بیٹے نے معمولی بات پر اپنی روزے دار ماں کی جان لے لی۔

تفصیلات کے مطابق یہ افسوسناک واقعہ گجرات کے علاقے مراریاں میں پیش آیا، جو انڈسٹریل اسٹیٹ 2 پولیس اسٹیشن کی حدود میں آتا ہے۔ اطلاعات کے مطابق عثمان نواز نامی شخص نے اپنی والدہ رضیہ بی بی سے ناشتہ تیار کرنے کو کہا، جس پر والدہ نے جواب دیا کہ وہ روزے سے ہیں اور کچھ دیر آرام کے بعد ناشتہ بنا دیں گی۔ اس بات پر عثمان نواز غصے میں آگیا اور اشتعال میں آ کر اپنی والدہ کے سر پر لوہے کی سلاخ دے ماری، جس کے نتیجے میں وہ موقع پر ہی دم توڑ گئیں۔

واقعے کی اطلاع ملتے ہی پولیس موقع پر پہنچ گئی اور ملزم کو گرفتار کرلیا، جب کہ مقتولہ کی لاش کو عزیز بھٹی شہید ٹیچنگ اسپتال منتقل کیا گیا۔ پولیس نے مقتولہ کے دوسرے بیٹے، فرمان علی، کی مدعیت میں ملزم کے خلاف تعزیرات پاکستان کی دفعہ 302 کے تحت مقدمہ درج کرلیا ہے۔