لاہور ( این این آئی) پاکستان کرکٹ بورڈ نے دور نیوزی لینڈ کے لیے پاکستان کے ون ڈے اور ٹی ٹونٹی اسکواڈز کا اعلان کر دیا جس میں چار بڑے کھلاڑیوں کو ڈراپ کر دیا گیا ،قومی ٹیم کے ون ڈے اسکواڈ سے فاسٹ بولر شاہین شاہ آفریدی اور حارث رئوف جبکہ ٹی ٹونٹی اسکواڈ سے محمد رضوان اور بابراعظم کو ڈراپ کر دیا گیا۔ہیڈکوچ عاقب جاوید نے پی سی بی ہیڈ کوارٹرز میں پریس کانفرنس کرتے ہوئے بتایا کہ16سے 26مارچ تک ہونے والی پانچ ٹی ٹونٹی انٹرنیشنل میچوں کی سیریز کے لیے سلمان علی آغا کو پاکستان ٹی ٹونٹی ٹیم کا کپتان مقرر کردیا گیا ہے، شاداب خان نائب کپتان ہوں گے ۔ محمد رضوان ون ڈے کپتان کے طور پر برقرار رہیں گے ۔29مارچ سے 5اپریل تک 50اوورز کے تین ون ڈے انٹرنیشنل میچوں کے لیے سلمان علی آغا ان کے نائب کے طور پر خدمات انجام دیں گے۔
سلمان اور شاداب کو بالترتیب ٹی ٹونٹی کپتان اور نائب کپتان مقرر کرنے کا فیصلہ آنے والے دو بڑے ٹورنامنٹس اے سی سی مینز ٹی ٹونٹی ایشیا کپ2025(ستمبر 2025) اور آئی سی سی مینز ٹی ٹونٹی ورلڈ کپ (فروری مارچ 2026) کو دیکھتے ہوئے کیا گیا ہے۔ سلمان نے اس سے قبل گزشتہ سال زمبابوے کے خلاف ٹی ٹونٹی سیریز میں پاکستان کی قیادت کی تھی جس میں 2-1 سے کامیابی حاصل کی تھی۔آئی سی سی مینز ٹی ٹونٹی ورلڈ کپ 2026ء کی تیاریوں کے ایک حصے کے طور پر پاکستان اے سی سی ایشیا کپ 2025 میں کم از کم پانچ ٹی ٹوئنٹی میچز اور تین تین میچز ویسٹ انڈیز کے خلاف (اوے ، جولائی)، افغانستان (ہوم، اگست)، آئرلینڈ (ہوم، ستمبر)، جنوبی افریقہ (ہوم، ستمبر اکتوبر)، سری لنکا (ہوم نومبر)اور آسٹریلیا (جنوری 2026)کھیلے گا۔محمد رضوان ون ڈے ٹیم کی قیادت جاری رکھیں گے کیونکہ پاکستان آئی سی سی مینز 50اوورز کرکٹ ورلڈ کپ 2027کی تیاری کر رہا ہے جو اکتوبرنومبر 2027میں نمیبیا، جنوبی افریقہ اور زمبابوے میں ہوگا۔
دورہ نیوزی لینڈ کے لیے پاکستانی ٹی ٹونٹی اسکواڈ میں سلمان علی آغا (کپتان)، شاداب خان (نائب کپتان)، عباس آفریدی، عبدالصمد، ابرار احمد، حارث رئوف، حسن نواز، عرفان خان نیازی، جہانداد خان، خوشدل شاہ، محمد علی، محمد حارث، عمیر بن یوسف، شاہین شاہ آفریدی، سفیان مقیم اور عثمان خان شامل ہیں جبکہ ون ڈے اسکواڈ میں محمد رضوان (کپتان)، سلمان علی آغا (نائب کپتان)، عبداللہ شفیق، ابرار احمد، عاکف جاوید، بابر اعظم، فہیم اشرف، امام الحق، عرفان خان نیازی، خوشدل شاہ، محمد علی، محمد وسیم جونیئر، نسیم شاہ، سفیان مقیم اور طیب طاہر شامل ہیں ۔ اوپنر فخر زمان اور صائم ایوب کو طبی مشورے پر دونوں فارمیٹ کے لیے زیر غور نہیں لایا گیا۔فخر کو نیوزی لینڈ کے خلاف پاکستان کے آئی سی سی چیمپئنز ٹرافی 2025کے افتتاحی میچ کے دوران بائیں نچلے انٹرکوسٹل پٹھوں میں موچ کا سامنا کرنا پڑا جبکہ صائم جنوری میں جنوبی افریقہ کے خلاف کیپ ٹان ٹیسٹ کے پہلے دن دائیں ٹخنے کے فریکچر کے بعد صحت یاب ہو رہے ہیں۔
دونوں کے 11اپریل 2025کو راولپنڈی میں شروع ہونے والی ایچ بی ایل پاکستان سپر لیگ 10کے لیے مکمل فٹ ہونے کی امید ہے۔ٹی ٹونٹی اسکواڈ میں تین ان کیپڈ کھلاڑی عبدالصمد، حسن نواز، اور محمد علی شامل ہیں جبکہ عاکف جاوید اور محمد علی نے ابھی ون ڈے ڈیبیو کرنا ہے۔ ان کھلاڑیوں کو چیمپئنز ون ڈے اور ٹی ٹونٹی کپ میں شاندار کارکردگی کی بنیاد پر اسکواڈ میں شامل کیا گیا ہے۔ چیمپئنز ٹی ٹونٹی کپ میں عبدالصمد نے 166.67کے اسٹرائیک ریٹ پر 115رنز بنائے جبکہ چیمپئنز ون ڈے کپ میں انہوں نے122کے اسٹرائیک ریٹ پر 145رنز اسکور کیے۔ اسی طرح حسن نواز چیمپیئنز ٹی ٹونٹی کپ میں 142.47کے اسٹرائیک ریٹ سے 312رنز بنا کر دوسرے نمبر پر رہے۔ محمد علی 22 وکٹوں کے ساتھ چیمپئنز ٹی ٹونٹی کپ میں سب سے زیادہ وکٹیں لینے والے بولر تھے جبکہ انہوں نے چیمپئنز ون ڈے کپ میں تین وکٹیں حاصل کی تھیں۔
عاکف جاوید کو چیمپئنز ون ڈے کپ کے پانچ میچوں میں سات وکٹیں لینے کے بعد ون ڈے ٹیم میں منتخب کیا گیا ہے جبکہ انہوں نے چیمپئنز ٹی ٹونٹی کپ میں 15وکٹیں حاصل کی تھیں۔عاقب جاوید دورہ نیوزی لینڈ میں عبوری ہیڈ کوچ کے طور پر کام جاری رکھیں گے۔ ان کی اصل مدت آئی سی سی چیمپیئنز ٹرافی 2025تک تھی لیکن انہیں مستقل ہیڈ کوچ کی تلاش شروع ہونے تک اپنی مدت میں توسیع کے لیے کہا گیا ہے۔ محمد یوسف کو بیٹنگ کوچ مقرر کیا گیا ہے۔
پلیئر سپورٹ اسٹاف میں نوید اکرم چیمہ (ٹیم مینیجر)، عاقب جاوید (عبوری ہیڈ کوچ)، اظہر محمود (اسسٹنٹ کوچ)، محمد یوسف (بیٹنگ کوچ)، محمد مسرور (فیلڈنگ کوچ)، کلف ڈیکن (فزیو تھراپسٹ)، ڈریکس سائمن (اسٹرینتھ اینڈ کنڈیشننگ کوچ)، طلحہ بٹ (انالسٹ )، ارتضی کمیل (سکیورٹی مینیجر)، ڈاکٹر واجد علی رفائی (ٹیم ڈاکٹر)، سید نعیم احمد (میڈیا اور ڈیجیٹل منیجر) اور سرجیو باسل مولنز ( میسیور) شامل ہیں ۔نیوزی لینڈ کے دورے کے شیڈول کے مطابق 16مارچ کو پہلا ٹی ٹونٹی انٹرنیشنل ، ہیگلے اوول، کرائسٹ چرچ، 18مارچ کو دوسرا ٹی ٹونٹی انٹرنیشنل، یونیورسٹی اوول، ڈنیڈن، 21مارچ کو تیسرا ٹی ٹونٹی انٹرنیشنل، ایڈن پارک، آکلینڈ، 23مارچ کو چوتھا ٹی ٹونٹی انٹرنیشنل، بے اوول، مانٹ مونگانوئی اور 26 مارچ کو پانچواں ٹی ٹونٹی انٹرنیشنل، اسکائی اسٹیڈیم، ویلنگٹن میں کھیلا جائے گا ۔ اس کے علاوہ 29مارچ کو پہلا ون ڈے انٹرنیشنل ، میک لین پارک، نیپیئر، 2اپریل کو دوسرا ون ڈے انٹرنیشنل، سیڈن پارک، ہیملٹن اور 5اپریل کو تیسرا ون ڈے انٹرنیشنل، بے اوول، مانٹ مونگانوئی میں کھیلا جائے گا ۔
