اسلام آباد (نیوز ڈیسک) وفاقی وزارت داخلہ نے سہ فریقی کرکٹ سیریز کے لیے آرمی اور رینجرز کی تعیناتی کی اجازت دے دی ہے۔ 5 سے 10 فروری کے دوران ہونے والے میچز کے دوران پنجاب میں آرمی اور رینجرز کی ایک، ایک کمپنی تعینات کی جائے گی۔پنجاب پولیس کی درخواست پر محکمہ داخلہ پنجاب نے وفاقی حکومت کو اس حوالے سے مراسلہ ارسال کیا تھا۔

اس سہ ملکی ٹورنامنٹ میں پاکستان، نیوزی لینڈ اور جنوبی افریقہ کی ٹیمیں مدمقابل ہوں گی۔ 8 اور 10 فروری کو ہونے والے میچز قذافی اسٹیڈیم، لاہور میں کھیلے جائیں گے۔نیوزی لینڈ کی ٹیم پیر اور منگل کی درمیانی رات پاکستان پہنچے گی، جبکہ 6 فروری کو پاکستان اور نیوزی لینڈ کی ٹیمیں قذافی اسٹیڈیم میں فلڈ لائٹس کے نیچے پریکٹس کریں گی۔ جنوبی افریقہ کی ٹیم 7 فروری کو پاکستان پہنچے گی۔یہ بھی واضح رہے کہ سیریز کا آخری لیگ میچ اور فائنل مقابلہ کراچی میں منعقد کیا جائے گا۔