اسلام آباد (نیوز ڈیسک ) پاکستان نوجوان پر دھوکہ دہی کا الزام عائد کرنے اور کراچی میں گارڈن کے علاقے میں ایک رہائشی عمارت میں ڈیرا ڈالنے والی امریکی خاتون اونیجا اینڈریو رابنسن کا امریکہ میں مجرمانہ ریکارڈ نکل آیا۔آج نیوز کے مطابق آن لائن موجود ریکارڈ میں خاتون کا مگ شاٹ بھی موجود ہے یعنی وہ تصویر جو گرفتاری کے بعد لی جاتی ہے۔

تصویر سے تصدیق ہوتی ہے کہ یہ ریکارڈ اسی خاتون کا ہے جو کراچی میں موجود ہے اور پاکستانی نوجوان سے ملنے کیلئے ہنگامہ برپا کیے ہوئے ہے۔مذکورہ ریکارڈ میں خاتون کی تاریخ پیدائش بھی وہی ہے جو کراچی آنے والی خاتون کے پاسپورٹ پر درج ہے، ریکارڈ سے ظاہر ہوتا ہے کہ اونیجا کو فروری 2021 میں امریکی ریاست جنوبی کیرولینا کی کاؤنٹی چارلسٹن میں گرفتار کیا گیا تھا۔خاتون پر وارننگ کے باوجود کسی دوسرے شخص کے گھر میں زبردستی گھسنے کا اعلان تھا۔

اونیجا کا یہ ریکارڈ امریکہ میں گرفتاریوں سے متعلق ریکارڈ رکھنے والی ایک غیر سرکاری ویب سائٹ مگ شاٹس زون پر موجود ہے اور یہ سرکاری ریکارڈ ہر گز نہیں۔ اس ریکارڈ سے یہ بھی ثابت نہیں ہوتا کہ گرفتار ہونے والا شخص واقعی مجرم ثابت ہوا ہے۔واضح رہے کہ امریکا کی ریاست نیویارک سے تعلق رکھنے والی 33 سالہ اونیجا اینڈریو رابنس کراچی کے رہائشی 19 سالہ ندال میمن سے سوشل میڈیا پر محبت میں مبتلا ہونے کے بعد کراچی پہنچی تھیں۔والدین کی ناراضی پرنوجوان اس خاتون کو چکمہ دے کرغائب ہوا تو خاتون جو رقم لائی تھی اس کی مدد سے کچھ دن گزارے اور پھر دربدر ہوگئی۔