اسلام آباد (نیوز ڈیسک)کوئٹہ میں امریکی نژاد لڑکی کے قتل کی گتھی سلجھ گئی۔پولیس کے مطابق بلوچی اسٹریٹ میں قتل ہونے والی 13 سالہ لڑکی کے کیس میں اس کے والد اور ماموں کو حراست میں لے لیا گیا ہے۔تحقیقات کے دوران انکشاف ہوا کہ مقتولہ کے والد نے اپنے سالے کے ساتھ مل کر بیٹی کو گولی مار کر ہلاک کیا۔پولیس حکام کا کہنا ہے کہ گرفتار ملزمان نے اعترافی بیان میں بتایا کہ مقتولہ غیر اخلاقی ویڈیوز بنانے میں ملوث تھی، جس کی بنا پر اسے موت کے گھاٹ اتار دیا گیا۔
مقدمے کو مزید تحقیقات کے لیے سیریس کرائم انویسٹی گیشن ونگ کے حوالے کر دیا گیا ہے۔یاد رہے کہ ابتدائی طور پر لڑکی کے والد نے پولیس کو بتایا تھا کہ وہ 28 سال سے امریکا میں مقیم تھا اور 15 جنوری کو بچوں کے ساتھ لاہور پہنچا، جس کے بعد 22 جنوری کو کوئٹہ آیا۔ والد کے مطابق گھر کے باہر نامعلوم افراد نے فائرنگ کی، جس کے نتیجے میں اس کی بیٹی جاں بحق ہو گئی۔ تاہم مزید تحقیقات میں یہ کہانی جھوٹی ثابت ہوئی۔
