ڈھاکہ / اسلام آباد (این این آئی)بنگلادیش نے پاکستانیوں کیلئے ویزا شرائط آسان کردیں، پاکستانی شہری آن لائن ویزا حاصل کرسکیں گے ۔ بنگلادیشی سفیر محمد اقبال خان نے لاہور چیمبر آف کامرس سے خطاب کرتے ہوئے کہا کہ بنگلادیش کے عوام پاکستانیوں کو عزت کی نگاہ سے دیکھتے ہیں۔انہوں نے کہا کہ دونوں ممالک کو معاشی اور اقتصادی تعاون کو مضبوط کرنا ہوگا، بنگلادیش نے اہل پاکستان کیلئے ویزا شرائط بہت زیادہ آسان کردی ہیں۔
انہوں نے کہا کہ اب پاکستان کے شہری بنگلا دیش کا ویزا آن لائن بھی حاصل کرسکتے ہیں، دونوں ممالک کے درمیان تعاون بڑھانا وقت کی ضرورت ہے۔ انہوں نے کہا کہ لاہور کی تہذیب اور ثقافت کسی تعارف کی محتاج نہیں، بنگلادیش کے عوام پاکستانی عوام سے محبت کا رشتہ رکھنا چاہتے ہیں۔انہوں نے کہا کہ پاکستان اور بنگلادیش کی باہمی تجارت بڑھانے کیلئے لاہور چیمبرز نمایاں کردار ادا کر سکتا ہے۔
