اسلام آباد (نیوزڈیسک) پاکستان نے بھارتی حکومت کی جانب سے 8 اکتوبر کو سمجھوتا ایکسپریس کی آمدورفت کو روکنے کے آپریشن اور اس کے نتیجے میں مسافروں کو پیش آنے والی مشکلات پر تشویش کا اظہار کرتے ہوئے اس صورتحال پر بھارت سے باضابطہ احتجاج کیا ہے۔ جمعہ کو اسلام آباد میں بھارتی ہائی کمیشن کے قائم مقام ڈپٹی ہائی کمشنر راگھورام کو وزارت خارجہ طلب کیا گیا جہاں وزارت خارجہ کے ڈائریکٹر جنرل (جنوبی ایشیا) ڈاکٹر محمد فیصل نے اس واقعہ پر انہیں پاکستانی حکومت کی تشویش سے آگاہ کیا اور انہیں بتایا کہ سمجھوتہ ایکسپریس کے آپریشن سے 200 مسافروں کو جن میں دونوں ملکوں کے مسافر شامل تھے شدید مشکلات اور ذہنی اذیت کا شکار ہونا پڑا۔ بھارتی سفارتکار کو باور کرایا گیا وہ بھارتی مسافر جو اس آپریشن کی وجہ سے پاکستان سے بھارت نہیں جاسکے حکومت پاکستان نے مسافروں کو قیام کے دوران مناسب انداز سے اکاموڈیٹ کیا اور ان کے قیام کیلئے موزوں اقدامات کئے۔