اسلام آباد (این این آئی)پی ٹی آئی کے ڈی چوک پر احتجاج میں شرکت کیلئے آنیوالے 412افراد کواسلام آباد پولیس نے گرفتار کرلیا جن میں سے 60 کا تعلق افغانستان سے ہے۔میڈیا رپورٹ کے مطابق وفاقی پولیس نے تحریک انصاف کے (آج) ڈی چوک پر ہونے والے احتجاج کی تیاری میں مصروف پی ٹی آئی کارکنوں کی پکڑ دھکڑ شروع کردی ہے۔

پولیس ذرائع کے مطابق احتجاج میں شرکت کیلئے اسلام آباد آنیوالے 412 افراد گرفتار ہوئے جن میں سے 60 افغانی نکلے ہیں، گرفتار افراد کے قبضے سے کیلوں والے ڈنڈے، غلیل اور کنچے برآمد ہوئے ہیں۔ذرائع کے مطابق پی ٹی آئی کے کارکنان کو بارہ کہو، ترنول، سنگجانی سے گرفتار کیا گیا۔ مظاہرین کی گرفتاری کے بعد سیکیورٹی کو ہائی الرٹ کردیا گیا ہے جبکہ وفاقی دارالحکومت میں ریڈ زون کی سیکیورٹی کے لئے رینجرز کو طلب کرلیا گیا ہے۔