بیروت(این این آئی) لبنان کے دارالحکومت بیروت کے علاقے داہیہ میں رہائشی عمارتوں پر اسرائیلی حملے میں حسن نصر اللہ کی بیٹی زینب نصر اللہ سمیت حزب اللہ کے میزائل یونٹ کے سربراہ محمد علی اسماعیل اور ان کے نائب حسین احمد اسماعیل کو مارنے کا دعوی کیا گیا ہے۔میڈیارپورٹس کے مطابق حزب اللہ نے خبر کی تصدیق یا تردید نہیں کی، حزب اللہ نے اسرائیلی فوج کے بیروت کی رہائشی عمارتوں کے تہہ خانوں میں اسلحہ ہونے کے بیان کی تردید بھی کی ہے۔

حزب اللہ ذرائع کے مطابق حسن نصر اللہ محفوظ ہیں، حزب اللہ کی جانب سے 65 راکٹ فائر کیے گئے، کئی مقامات پر آگ لگ گئی، اسرائیلی شہر تل ابیب میں حملوں کا الرٹ جاری کردیا گیا، فضائی دفاعی نظام ہائی الرٹ ہے، شیلٹرز کھول دیے گئے ہیں۔بیروت میں حزب اللہ کے ہیڈ کوارٹر پر کیے گئے اسرائیلی حملے میں زینب نصراللہ کی شہادت کا دعوی کیا گیا ہے تاہم حزب اللہ یا لبنانی حکام کی جانب سے تاحال اس خبر کی تصدیق نہیں کی جاسکی ہے۔ زینب نصر اللہ لبنان میں حزب اللہ کی حمایت اور اپنے خاندان کی قربانیوں کیلئے ایک مضبوط آواز کے طور پر پہچان رکھتی ہیں۔