اسلام آباد (این این آئی) قومی اسمبلی میں قائد حزب اختلاف عمر ایوب خان نے کہا ہے کہ امام حسین نے باطل کے سامنے ڈٹنے کا درس دیا ہے،انصا ف کے بغیر معاشرہ ترقی نہیں کر سکتا ،بحیثیت قوم عمران خان کے پیچھے متحد ہو کر معاشرے سے ناانصافی کے خاتمے ،قانون کی حکمرانی کیلئے جدوجہد کرنی ہوگی۔ قومی اسمبلی میں قائد حزب اختلاف عمر ایوب خان نے یوم عاشورہ محرم الحرام کے موقع پر قوم کے نام پیغام میں کہا کہ یوم عاشور نواسہ رسولۖ کی شہادت کا دن ہے اور امام عالی مقام کی شہادت ایک ایسا المناک اور درد انگیز واقعہ ہے کہ امت صدیاں گزرنے کے باوجود ان کی شہادت پرآج بھی افسردہ اور غم ناک ہے، سینکڑوں برس گزر جانے کے باوجود یہ زخم، غم اور واقعہ تازہ ہے۔
انہوں نے علما اور مشائخ کو محرم الحرام کے حقیقی پیغام امن ایثار قربانی، برداشت اور اتحاد کو اجاگر کرنے کی ضرورت پر زور دیا۔ انہوں نے کہا کہ واقعہ کربلا شہدا کربلا کی لازوال قربانیوں کو یاد دلاتا ہے۔ انہوں نے کہا کہ فلسفہ شہادت وکربلا والوں کی یزیدیت کی جنگ نے امت مسلمہ کو ہمیشہ کے لیے ایک واضح پیغام دے دیا کہ تعداد میں آپ مٹھی بھر کیوں نہ ہو ہمیشہ باطل کے سامنے کربلا والوں کی طرح ڈٹ جائو ۔
انہوں نے کہا کہشہدا کربلا ظلم کے خلاف اٹھ کھڑے ہوئے کیونکہ کربلا کی جدوجہد ظلم کے خلاف اور حق کے لیے تھی۔ انہوں نے کہا انصاف کے بغیر معاشرہ ترقی نہیں کر سکتا اس لیے ہمیں بحیثیت قوم عمران خان کے پیچھے متحد ہو کر اپنے معاشرے سے ناانصافی کے خاتمے ،قانون کی حکمرانی کیلئے جدوجہد کرنی ہوگی۔
