لاہور( این این آئی)ملک میں رواں سال جون سے اگست تک مون سون کی متوقع بارشوں کا آئوٹ لک جاری کردیا گیا، رواں سال بیشتر مقامات پر معمول اور معمول سے زائد بارشوں کا امکان ہے۔محکمہ موسمیات کے مطابق معمول سے زائد بارشوں کا زیادہ امکان وسطی اور شمالی پنجاب میں ہوگا، جنوبی سندھ میں بھی معمول سے زائد بارشیں ہوسکتی ہیں۔ایک بیان میں محکمہ موسمیات نے کہا ہے کہ بلوچستان میں بھی رواں سال معمول سے کچھ زائد بارشیں متوقع ہیں، خیبر پختوانخواہ اور گلگت بلتستان میں رواں سال معمول کے مطابق بارش ہوسکتی ہے۔

محکمہ موسمیات کے مطابق مون سون کے دوسرے مرحلے کے مقابل پہلے مرحلے میں زائد بارشوں کا امکان ہے۔زائد درجہ حرارت کے باعث خیبر پختوانخواہ ، کشمیر اور گلگت بلتستان میں برف پگھلنے کا عمل تیز ہوگا، ملک کے اکثر مقامات پر جون کے آغاز میں دن کا درجہ حرارت معمول سے زائد ہوگا۔