فیصل آباد (این این آئی)فیصل آباد کے قریب موٹر وے ایم تھری پر ڈاکوں نے گاڑیاں روک کر لیویز اہلکاروں سمیت کئی مسافروں کو لوٹ لیا۔پولیس کے مطابق کوئلے کا کاروبار کرنیوالا سیالکوٹ کا رہائشی تاجر بلوچستان میں کوئلے کی کان پر جارہا تھا، سکیورٹی کیلئے تین لیویز اہلکار بھی تاجر کے ساتھ تھے کہ موٹر وے ایم تھری پر سمندری انٹرچینج کے قریب ڈاکوں نے تاجر کی گاڑی کو روک کر اسلحہ تان لیا۔

ملزمان نے موبائل فونز، نقدی اور لیویز اہلکاروں سے ان کا سرکاری اسلحہ بھی چھین لیا۔اس کے علاوہ ڈاکوئوں نے موٹروے پر ٹرک کھڑا کرکے اور سامان بکھیر کر مزید تین گاڑیوں کو روکا اور لوٹ کر فرار ہوگئے۔ پولیس نے گزشتہ رات کی ڈکیتی کا مقدمہ تھانہ صدر سمندری میں درج کرلیا۔ایف آئی آر کے مطابق ڈاکوں کی عمریں 18 سے 20 سال تھیں۔