اسلام آباد (این این آئی)وزیراعظم کی ہدایت پر نجی یونیورسٹیز سمیت تمام نجی اداروں کیلئے لفظ نیشنل استعمال کرنے پر پابندی عائد کردی گئی۔ تفصیلات کے مطابق وزیراعظم شہباز شریف کی ہدایت پر نجی یونیورسٹیز سمیت تمام نجی اداروں کیلئے لفظ نیشنل استعمال کرنے پر پابندی عائد کردی گئی ہے۔
کابینہ ڈویژن نے تمام وزارتوں اور اداروں کو ہدایت جاری کرتے ہوئے کہا ہے کہ متعلقہ وزارتیں اور ادارے نجی شعبے کی کمپنیوں اور اداروں کیلئے لفظ نیشنل کا استعمال فوری رکوائیں، نجی یونیورسٹیز اور کمپنیز میں کوئی بھی ایسا لفظ استعمال نہ کیا جائے جس سے سرکاری ادارے کا تاثر ملے۔ کابینہ ڈویژن نے تمام وزارتوں اور اداروں سے عملدرآمد رپورٹ بھی طلب کرلی۔ واضح رہے کہ وزیراعظم کو نجی اداروں اور یونیورسٹیز کے نام میں لفظ نیشنل کے استعمال سے متعلق شکایات موصول ہوئی تھیں۔
