مکوآنہ (این این آئی)فیصل آباد پولیس نے گلے میں ڈور پھرنے سے کے واقعہ کے مرکزی ملزم کو گرفتار اور آن لائن پتنگ اور ڈور کی خرید و فروخت کے نیٹ ورک کو پکڑ لیا۔ تفصیلات کے مطابق پولیس لائن کمپلیکس فیصل آباد میں سی پی او کیپٹن (ر) محمد علی ضیا نے پولیس افسران کے ہمراہ پریس کانفرنس میں میڈیا کو بریفنگ دیتے ہوئے بتایا کہ تھانہ فیکٹری ایریا میں گلے پر ڈور پھرنے سے جاں بحق ہونے والے نوجوان آصف کے المناک واقعہ کے ملزم عابد کو گرفتار کرلیا ہے، ملزم نے دوران تفتیش پتنگ بازی کا اعتراف کرلیا۔

ملزم کی نشاندہی پر آن لائن ڈور اور پتنگیں فروخت کرنے کا نیٹ ورک پر پکڑ لیا گیا۔پریس کانفرنس میں ایس ایس انویسٹی گیشن اور دیگر افسران بھی موجود تھے۔سی پی او نے بتایا کہ دو تین دن قبل پتنگ بازی سے ایک قیمتی جان ضائع ہوئی، نوجوان آصف کی ہلاکت کا انتہائی دکھ ہوا۔وزیراعلی پنجاب نے واقعہ کا نوٹس لیتے ہوئے ملزمان کی گرفتاری کیلئے48 گھنٹے کا ٹائم دیا تھا۔واقعہ کو ٹریس کرنے کیلئے ہمارے پاس صرف ایک ڈور تھی۔

فیصل آباد پولیس کی مختلف ٹیموں نے جیو فینسگ، کال ریکارڈز اور سی سی ٹی وی سے نہ صرف کیس ٹریس کیا بلکہ اصل ملزمان کی شناخت کی۔ واقعہ کے قریب بینک کی عمارت کی چھت سے کچھ جلی ہوئی چیزیں ملیں۔اس بلڈنگ کے مالک عابد کو شامل تفتیش کیا تو زیر حراست عابد نے پتنگ بازی کا اعتراف کر لیا ہے، ملزم نے دو دن کی سی سی ٹی وی واش کروا دی تھی، آن لائن فروخت ہونے والی ڈور اور پتنگوں کا نیٹ ورک بھی پکڑ لیا ہے۔ سی پی او نے مزید بتایا کہ دو دن میں 280 مقدمات سمیت پتنگ سازی کا سامان بھی پکڑا گیا ہے۔