اسلام آباد (این این آئی)چوہدری پرویز الٰہی کے وکیل سردار عبدالرازق نے کہا ہے کہ پولیس نے پی پی 32 گجرات میں ضمنی انتخابات کے لیے پرویز الٰہی کے کاغذات نامزدگی داخل نہیں ہونے دئیے۔ایک بیان میں سردار عبدالرازق نے کہا کہ پی پی 32 ضمنی انتخابات کے لیے پرویز الٰہی کے کاغذات جمع کرانے تھے، پرویز الٰہی کی اہلیہ قیصرہ الٰہی اور وکلا ٹیم کو آر او آفس میں داخل نہیں ہونے دیا گیا۔

انہوں نے کہا کہ کاغذات نامزدگی چھیننے اور وکلا ٹیم کو گرفتار کرنے کی کوشش کی گئی، پرویز الٰہی نے گزشتہ روز اڈیالہ جیل میں کاغذات نامزدگی پر دستخط کیے تھے۔وکیل نے کہا کہ پیر کو کاغذات نامزدگی جمع کرانے کی آخری تاریخ ہے، چیف الیکشن کمشنر واقعے کا نوٹس لیں۔چوہدری پرویز الٰہی کے وکیل نے کہا کہ کاغذات نامزدگی داخل کرانے کے لیے ہائی کورٹ سے رجوع کریں گے۔