لاہور ( این این آئی) پاکستان مسلم لیگ (ن) کو بلوچستان اسمبلی کی 2نشستیں مل گئیں ۔ پاکستان مسلم لیگ (ن) کے صدر اور وزیراعظم کے نامزد امیدوار شہباز شریف سے بلوچستان اسمبلی کے حلقہ پی بی 41اور 51سے آزاد حیثیت میں انتخاب جیتنے والے ولی محمد اور عبدالخالق خان نے ملاقات کر کے مسلم لیگ (ن) میں شمولیت کا اعلان کیا ۔ پارٹی کے صوبائی صدر جعفر خان مندوخیل اور پارٹی رہنما جمال شاہ کاکڑ بھی ملاقات میں موجود تھے۔

شہباز شریف نے ولی محمد اور عبد الخالق خان کو مسلم لیگ (ن) میں شمولیت پر مبارک اور خیر مقدم کرتے ہوئے کہا کہ آپ نے پاکستان کے استحکام کے لئے کردار ادا کیا، جو لائق تحسین ہے، پاکستان کو انتشار نہیں استحکام کی ضرورت ہے۔ انہوں نے کہا کہ مسائل لڑائی سے نہیں بات چیت اور مل کر چلنے سے ہی حل ہو سکتے ہیں، پاکستان کی ترقی کے لئے بلوچستان کی ترقی کو اولین تقاضا سمجھتے ہیں۔نومنتخب ارکان نے وزیراعظم نامزد ہونے پر شہباز شریف کو مبارک دی۔