لاہور ( این این آئی) پاکستان مسلم لیگ (ن) کو قومی اسمبلی کی ایک، پنجاب اسمبلی کی 3اور خیبرپختونخوا اسمبلی کی 2مزید نشستیں مل گئیں ۔مسلم لیگ (ن) کے صدر ،وزیراعظم کے نامزد امیدوار شہباز شریف سے آزاد منتخب ہونے والے ارکان اسمبلی نے ملاقات کی جن میں قومی اسمبلی کے حلقہ این اے 92بھکر سے آزاد حیثیت میں انتخاب جیتنے والے رشید اکبر نوانی، پی پی 90بھکر سے احمد نواز نوانی، پی پی 92،93بھکر سے کامیاب عامر عنایت شاہانی ،خیبرپختونخوا اسمبلی کے حلقہ پی کے 106سے حشام انعام اللہ خان اور پی کے 82 سے ملک طارق اعوان شامل تھے ۔ پاکستان مسلم لیگ (ن) خیبر پختون خوا کے صدر انجینئر امیر مقام اور سردار اویس خان لغاری بھی ملاقات میں موجود تھے ۔اس سے قبل پی پی 205خانیوال سے اکبر حیات ہراج اور پی پی 212خانیوال سے اصغر حیات ہراج بھی مسلم لیگ (ن) میں شامل ہونے کا اعلان کر چکے ہیں ۔

نامزد وزیر اعظم شہباز شریف نے مسلم لیگ (ن میں شمولیت کرنے والے آزاد ارکان اسمبلی کا خیر مقدم اور مبارکباد دی ۔ جبکہ شمولیت اختیار کرنے والے ارکان نے قائد محمد نواز شریف پر مکمل اعتماد کا اظہار کرتے ہوئے کہا کہ محمد نواز شریف اور پاکستان مسلم لیگ (ن) ہی پاکستان کو مشکلات سے نکال سکتے ہیں، عدم استحکام ملک کے مفاد میں نہیں، حلقے کے عوام اور سپورٹرز کی مشاورت سے مسلم لیگ (ن) میں شامل ہونے کا فیصلہ کیا۔ اس موقع پر شہباز شریف نے کہا کہ آپ کا جذبہ قابل ستائش ہے، عدم استحکام کسی کے مفاد میں نہیں ، معاشی خطرات کا تقاضا ہے کہ سب مل کر پاکستان کے لئے کام کریں۔

انہوں نے کہا کہ پہلے بھی ملک کو ڈیفالٹ سے بچایا، اب بھی یہی ترجیح ہے، جن کا ایجنڈا انتشار ہے، وہ اب بھی انتشار پھیلا رہے ہیں، نواز شریف اپنی ذات اور سیاست کا نہیں، ہمیشہ پاکستان اور عوام کا مفاد سوچتے ہیں۔ شہباز شریف نے مزید کہا کہ ہم پاکستان کو کسی نئی مصیبت اور بحران سے بچانے کی کوشش کر رہے ہیں، خیبر پختون خوا کی ترقی چاہتے ہیں، خیبر پختون خوا میں ترقی سے ہی دہشت گردی پر قابو پایا جا سکتا ہے۔