اسلام آباد (این این آئی)الیکشن کمیشن نے این اے 56 راولپنڈی سے آزاد امیدوار شہریار ریاض کی درخواست قابل سماعت قرار دیتے ہوئے آئندہ سماعت پر پاکستان مسلم لیگ (ن)کے کامیاب امیدوار حنیف عباسی کو نوٹس جاری کردیا۔الیکشن کمیشن نے این اے 56 کے ریٹرننگ افسر کو شوکاز نوٹس جاری کرتے ہوئے آئندہ سماعت پر ذاتی حیثیت میں طلب کرلیا۔آزاد امیدوار شہریار ریاض کی عذر داری درخواست پر چیف الیکشن کمشنر کی سربراہی میں 2 رکنی کمیشن نے سماعت کی، چیف الیکشن کمشنر نے کہا کہ این اے 56 کے ریٹرننگ افسر نے رپورٹ بھجوا دی ہے۔