لاہور ( این این آئی) لاہور ہائیکورٹ نے پاکستان مسلم لیگ (ن) کے قائد نواز شریف اور پارٹی صدر شہبازشریف کی عام انتخابات میں کامیابی کے خلاف دائر درخواستوں پردرخواست گزاروں کوالیکشن کمیشن سے رجوع کرنے کا حکم دیتے ہوئے تحریری حکم نامہ بھی جاری کر دیا۔لاہور ہائیکورٹ کے جسٹس علی باقر نجفی نے میاں محمد نواز شریف کی حلقہ این اے 130سے کامیابی کے خلاف ایڈوکیٹ چودھری اشتیاق کی درخواست کا تحریری فیصلہ جاری کر دیا۔
عدالت نے تحریری فیصلے میں لکھا کہ درخواست گزار الیکشن کمیشن سے فیصلہ کروانے کے باعث عدالت سے درخواست واپس لینا چاہتا ہے۔ عدالت نے درخواست واپس لینے کی بنا پرخارج کردی۔جبکہ لاہور ہائیکورٹ نے صدر مسلم لیگ (ن) شہباز شریف کی حلقہ پی پی 164سے انکے مخالف امیدوار محمد یوسف کی درخواست واپس لینے کی بنا پر خارج کر دی۔عدالت نے تحریری فیصلے میں لکھا کہ درخواست گزار الیکشن کمیشن کے سامنے معاملہ رکھنے پر رضامند ہے ،عدالت درخواست گزار کو الیکشن کمیشن سے رجوع کرنے کی ہدایت کرتی ہے۔عدالت نے درخواست واپس لینے کی بنا پر خارج کردی۔
