کوہاٹ (این این آئی)کوہاٹ میں نجی ٹرسٹ کے زیر اہتمام 45نوجوان جوڑوں کی اجتماعی شادی کا اہتمام کیا گیا، ہر جوڑے کو زندگی گزارنے کے لیے ڈیڑھ لاکھ روپے مالیت کا جہیز بھی دیا گیا۔تفصیلات کے مطابق کوہاٹ کے علاقہ بنگش میں نجی ٹرسٹ کے زیر اہتمام 45 نوجوان جوڑوں کی اجتماعی شادی کا اہتمام کیا گیا۔تقریب میں نوبیاہتا جوڑوں کے والدین، رشتہ دار اور علما کرام نے شرکت کی اور اس اجتماعی شادی کو خوش آئند قرار دیا۔ہر جوڑے کو زندگی گزارنے کے لیے ڈیڑھ لاکھ روپے مالیت کا جہیز بھی دیا گیا۔

اس موقع پر علامہ قیصر عباس نے کہا کہ اجتماعی شادی کا رجحان بہت اچھا ہے اس سے غریبوں کو سپورٹ مل جاتی ہے اور ان کے بیٹوں اور بیٹیوں کی شادی مناسب وقت پر ہوجاتی ہے۔رشتہ ازدواج میں بندھنے والے نوجوانوں نے کہا کہ بنگش میں غریب اور ضرورت مند نوجوانوں کے لیے اجتماعی شادی کا اہتمام ان کی زندگی کا سب سے بڑا تحفہ ہے۔ایک دولہا نے کہا کہ مہنگائی کے اس دور میں معاشرے میں اجتماعی شادی کے کلچر کو فروغ دینا وقت کی ضرورت ہے۔