اسلام آباد(این این آئی)پاکستان نے ایران میں پاکستانی مزدوروں کے قتل پر کہا ہے کہ ایسے بزدلانہ حملے پاکستان کو دہشت گردی سے لڑنے کے عزم کو نہیں روک سکتے۔ترجمان دفتر خارجہ ممتاز زہرا بلوچ نے ایک بیان میں کہا کہ یہ ہولناک اور قابل نفرت واقعہ ہے، ہم بلاشبہ اس کی مذمت کرتے ہیں، ایرانی حکام کے ساتھ رابطے میں ہیں، واقعے کی فوری تحقیقات اور ملوث افراد کا فوری محاسبہ کیا جائے۔
ترجمان دفترخارجہ نے کہاکہ زاہدان میں ہمارے قونصل جنرل اسپتال جا رہے ہیں جہاں زخمیوں کا علاج کیا جا رہا ہے، قونصلر مقامی حکام سے بھی ملاقات کریں گے، ہمارے قونصلر سخت کارروائی کی فوری ضرورت پر زور دیں گے۔ترجمان دفترخارجہ کے مطابق تمام ضروری اقدامات کر رہے ہیں، پاکستانی سفارت خانہ لاشیں وطن واپس لانے کی جلد از جلد پوری کوشش کریگا، ایسے بزدلانہ حملے پاکستان کو دہشت گردی سے لڑنے کے عزم سے نہیں روک سکتے۔
