لاہور(این این آئی)لاہور ہائیکورٹ نے پی ٹی آئی کے سابق چیئرمین عمران خان کی 7مقدمات میں ضمانتیں خارج کرنے کا فیصلہ کالعدم قرار دینے کا 12صفحات پر مشتمل تفصیلی فیصلہ جاری کر دیا۔

تفصیلی فیصلے میں کہا گیاہے کہ سابق چیئرمین پی ٹی آئی مختلف مقدمات میں عبوری ضمانت پر تھے،عبوری ضمانتوں کے دوران انہیں ایک کیس میں سزا ہوئی، عمران خان گرفتاری کی وجہ سے ٹرائل کورٹ میں پیش نہیں ہو سکے، عدم پیشی کی وجوہات ٹرائل کورٹ کے علم میں لائی گئیں۔عدالت نے اپنے فیصلے میں کہا کہ ٹرائل کورٹ نے حقائق کا درست جائزہ نہیں لیا، عمران خان کی ضمانتیں خارج کرنے کا فیصلہ کالعدم قرار دیا جاتا ہے،ٹرائل کورٹ ویڈیو لنک کے ذریعے 6فروری تک درخواست ضمانتوں پر فیصلہ کرے۔