میر پور (این این آئی)شادی کے بہانے لڑکیوں کی بیرون ملک انسانی اسمگلنگ میں ملوث گروہ کی ملزمہ کو آزاد کشمیر کے شہر میرپور سے گرفتار کر لیا گیا۔پولیس کے مطابق ملزمہ پاکستانی نڑاد فرانسیسی شہری ہے جس کا تعلق جہلم سے ہے، ملزمہ لڑکے کا بھیس بدل کر پاکستان آتی، شادی کر کے دلہن کو بیرون ملک لے جا کر فروخت کر دیتی تھی۔
متاثرہ فیملی کی درخواست پر پولیس نے غیرملکی لڑکی کے خلاف مقدمہ درج کر لیا۔متاثرہ لڑکی کے والد چوہدری رمضان نے کہا کہ ملزمہ نرگس نے شعبان کے نام سے اپنی شناخت بنا رکھی تھی، نکاح کے بعد بیٹی کا ویزا لگوا کر براستہ دبئی فرانس بھیجا تو علم ہوا کہ بیٹی کی لڑکی سے شادی ہوئی ہے۔
چوہدری رمضان نے کہا کہ بیٹی پر اس گروہ نے تشدد کیا اور کئی مقامات پر فروخت کی کوشش کی، فرانس میں بمشکل بیٹی کو محفوظ مقام پر منتقل کیا ہے۔ لڑکی کے والد کا کہنا ہے کہ ملزمہ نے دوبارہ پاکستان آکر رشتہ تلاش کیا تو پولیس کو اطلاع دے کر گرفتار کرا لیا، میری بیٹی کو واپس پاکستان لایا جائے، کسی اور کے ساتھ ایسا نہ ہو، انصاف دلایا جائے۔پولیس نے کہا کہ ملزمہ کو خواتین حوالات میں رکھ کر تفتیش کر رہے ہیں۔
