ڈیرہ اسماعیل خان(این این آئی)سربراہ جے یو آئی (ف) مولانا فضل الرحمن نے الیکشن ملتوی کرنے کا مطالبہ کرتے ہوئے کہاہے کہ جے یو آئی دہشت گردوں کے نشانے پر ہے، موسم وامن وامان کی وجہ سے دھاندلی کاراستہ کھلتا ہے، الیکشن کمیشن کو ہماری درخواست پر غور کرنا چاہئے۔نجی ٹی وی کے مطابق ڈیرہ اسماعیل خا ن میں پریس کانفرنس کرتے ہوئے سربراہ جے یو آئی (ف) مولانا فضل الرحمن نے کہا کہ ملک کی بگڑتی صورتحال قابل افسوس ہے، جمعیت علما اسلام اس وقت دہشت گردوں کے نشانے پر ہے، الیکشن ہونے چاہئیں لیکن الیکشن کا ماحول بھی دیا جائے، ہم نہیں سمجھتے الیکشن ہوسکیں گے، الیکشن کمیشن کو ہماری الیکشن ملتوی کرنے کی درخواست پر غور کرنا چاہئے۔

انہوں نے کہا کہ پیپلز پارٹی کے امیدوار بھی کہتے ہیں کہ ان حالات کہ وجہ سے الیکشن نہیں لڑ سکتے، موسم اور امن و امان کی وجہ سے دھاندلی کا راستہ کھلتا ہے، بانی پی ٹی آئی نے قوم کے جوانوں کو گمراہ کیا، پاکستان اور افغانستان کا استحکام ایک دوسرے سے جڑا ہوا ہے، دونوں ممالک کے درمیان بداعتمادی پیدا کی جارہی ہے۔انہوںنے کہا کہ جہاں ضرورت ہوگی وہاں پر سیٹ ایڈجسٹمنٹ ہوگی، صرف پی ٹی آئی کے امیدواروں کے نہیں دیگر جماعتوں کے امیدواروں کے کاغذات نامزدگی بھی مسترد ہوئے ہیں، ہم نے اپنے علاقے کی مٹی سے ترقی کا عہد کیا ہوا ہے۔