سنگاپورسٹی(این این آئی)عالمی مارکیٹ میں ایک بار پھر خام تیل کی قیمتوں میں کمی ریکارڈ کی گئی۔غیرملکی خبررساں ادارے کے مطابق اوپیک پلس کے فیصلے کے مسلسل دبا ئواور عالمی ایندھن کی طلب میں اضافے پر غیر یقینی صورتحال کے درمیان پیر کو خام تیل کی فیوچر ٹریڈنگ میں تھوڑی دیر کیلئے اضافہ ہوا تاہم فلسطین صورتحال کے باعث سپلائی میں رکاوٹ کے خطرات کی وجہ سے قیمتیں گر گئیں ۔

عالمی منڈی میں برینٹ فیوچر 0.6 فیصد، یا 49 سینٹ کم ہو کر 78.39 ڈالر فی بیرل جبکہ یو ایس ویسٹ ٹیکساس انٹر میڈیٹ کروڈ فیوچر 0.6 فیصد، یا 42 سینٹ کی کمی سے 73.65 ڈالر فی بیرل پر آ گیا۔آئل مارکیٹ کے تجزیہ کار ادارے وانڈا انسائیٹس کے مطابق پٹرولیم برآمد کرنے والے ممالک کی تنظیم اور روس سمیت اتحادیوں کی طرف سے سپلائی میں کٹوتیوں بارے میں سرمایہ کاروں کے شکوک و شبہات پر تیل کی قیمتوں میں گزشتہ ہفتے 2 فیصد سے زیادہ کمی واقع ہوئی۔ اوپیک پلس نے عالمی پیداواری سرگرمیوں کی سست روی کے بارے میں تشویش کا اظہار بھی کیا ہے ۔