کراچی(این این آئی)شارٹ ٹرم کڈنیپنگ میں ملوث پولیس اہلکاروں سمیت 3ملزمان کو گرفتار کرکے، نقدی اور گاڑی بھی برآمد کرلی گئی ہے۔اس ضمن میں ایس ایس پی ملیرطارق مستوئی نے بتایا کہ شہری کے اغوا میں ملوث 2پولیس اہلکاروں سمیت 3 ملزمان کو پکڑ لیا گیا ہے۔ اسٹیل ٹائون پولیس نے نقدی، گاڑی اور اسلحہ برآمد کرلیا ہے۔انہوں نے بتایاکہ ملزمان نے تاجر کے اہلخانہ سے 29لاکھ روپے سے زائد تاوان طلب کیا۔

ملزمان نے 19 لاکھ روپے وصول کرکے تاجر کو رہا کیا۔طارق مستوئی کے مطابق ملزمان نے اہلخانہ کو ملیرکینٹ کے قریب بلا کر رقم وصول کی۔ ملزمان نے خود کو حساس ادارے کا اہلکار ظاہر کیا۔ملزم رفیق گارڈن ہیڈکوارٹز اور یونس کالا کوٹ تھانے میں تعینات ہے۔ گرفتار تیسرا ملزم پولیس اہلکاروں کا مخبرہے۔ گڈاپ میں تعینات ہیڈ کانسٹیبل سرفراز اور 2 ساتھیوں کی تلاش جاری ہے۔