اسلام آباد( این این آئی)ہونڈا موٹر زنے پاکستان سمیت مختلف ممالک میں الیکٹرک بائیکس اور بیٹریوں کے لئے اربوں ڈالر کی سرمایہ کاری کا اعلان کر دیا۔ کمپنی نے ایک بیان میں کہا ہے کہ برقی موٹرسائیکلوں اور بیٹریوں کے لیے مخصوص کارخانوں کی تعمیر کے لیے 2030 تک 3 ارب 40 کروڑ ڈالر کی سرمایہ کاری کا اعلان کیا ہے۔

بیان کے مطابق کمپنی نے الیکٹرک موٹر سائیکلوں کی فروخت کے اپنے عالمی ہدف کو بڑھا کر 2030 تک 40 لاکھ یونٹ سالانہ کر دیا ہے،سابقہ منصوبے کے تحت 35 لاکھ کا ہدف مقرر تھا۔ کمپنی کے مطابق وہ 2030 تک تقریباً 30 نمونوں کی موٹرسائیکلیں تیار کرنے کا منصوبہ رکھتی ہے جو 2025 تک کم از کم 10 نمونوں کے اعلان کردہ سابقہ منصوبے سے زیادہ ہیں۔غیر ملکی میڈیا کے مطابق ہونڈا کے ایک عہدیدار نے بتایا کہ کمپنی موئثر طور پر ایسی مصنوعات پیش کرے گی جو متنوع عالمی ضروریات کو پورا کریں۔