چنئی(این این آئی)سابق فاسٹ بولر وقار یونس کمنٹری کے دوران پاکستان کی افغانستان کے ہاتھوں شکست پر اس قدر دلبرداشتہ ہوئے کہ زبان بھی انکا ساتھ چھوڑ گئی۔پیر کو چنئی میں آئی سی سی ورلڈ کپ کے میچ میں افغانستان نے ون ڈے انٹرنیشنل کی تاریخ میں پہلی بار پاکستان کو شکست دی۔ورلڈ کپ جیسے اہم ٹورنامنٹ میں قومی ٹیم کی افغانستان کے ہاتھوں یک طرفہ مقابلے کے بعد 8 وکٹوں سے بدترین شکست نے ہر پاکستانی کو غمزدہ کردیا ہے۔

سوشل میڈیا پر وائرل پاکستان کے سابق مایہ ناز فاسٹ بولر وقار یونس کی ویڈیو نے ہر پاکستانی کے جذبات کی عکاسی کی ہے جن کے چہرے پر افغانستان سے شکست کی تکلیف نمایاں تھی۔پاکستان کے خلاف افغانستان کی تاریخی جیت کے بعد کمنٹری باکس میں موجود زمبابوے کے سابق کھلاڑی پومی مبانگوا نے تبصرے کرنا شروع کیے تو کمنٹری پینل میں موجود وقار یونس انتہائی افسردہ نظر آئے اور کچھ بولنے کے بجائے خاموشی اختیار کرلی۔دو فتوحات اور تین شکستوں کے ساتھ قومی ٹیم اب اپنا اگلا میچ 27 اکتوبر کو چنئی میں جنوبی افریقا کے خلاف کھیلے گی۔