اسلام آباد (این این آئی) نجی تعلیمی اداروں کو بغیر معاوضے کے پلاٹ الاٹ کرنے کے منصوبہ پرعملدرآمد کا فیصلہ کیا گیا ہے، سی ڈی اے نے درخواستیں طلب کرلی ہیں۔تفصیلات کے مطابق اسلام آباد میں نجی تعلیمی اداروں کو 300پلاٹ بغیر معاوضے کے الاٹ کرنے کے منصوبہ پر عملدرآمد کا فیصلہ کیا گیا ہے، سی ڈی اے نے نجی تعلیمی اداروں سے درخواستیں طلب کرلی ہیں۔نجی تعلیمی اداروں سے طلب کی گئی ہر درخواست کے ساتھ دو لاکھ روپے بطور رجسٹریشن جمع کروانے ہوں گے۔

نجی تعلیمی اداروں کو کمرشل ایریا میں 2، 4اور 10کنال پر محیط پلاٹ بلا معاوضہ دئیے جائیں گے، جبکہ ان پلاٹوں میں سرکاری اداروں کو مختص کردہ پلاٹ بھی شامل ہیں، منصوبے کا مقصد رہائشی علاقوں میں نجی سکول چلنے سے روکنا ہے۔دوسری جانب سرکاری تعلیمی اداروں کی جوائنٹ ایکشن کمیٹی نے حکومتی منصوبے کی مخالفت کرتے ہوئے حکومتی فیصلہ واپس نہ لینے پر عدالتی کارروائی کا عندیہ دے دیا ہے۔