لاہور( این این آئی)پاکستان کو چین سے گزشتہ ماہ مئی میں براہ راست غیر ملکی سرمایہ کاری کی مد میں26.6 ملین ڈالر موصول ہوئے ۔اعدادوشمار کے مطابق مجموعی طور پر مئی میں149.6 ملین ڈالر کی براہ راست غیر ملکی سرمایہ کاری آئی ۔ مئی میں چین سے 28.1 ملین ڈالر آئے تاہم 1.5 ملین ڈالر کا اخراج ہوا جس کے نتیجے میں چین سے 26.6 ملین ڈالر کی خالص براہ راست غیر ملکی سرمایہ کاری آئی اوریہ حجم پاکستان کی کل ایف ڈی آئی کا 17.1 فیصد ہے۔

رپورٹ کے مطابق رواں سال اپریل میں پاکستان کو چین سے 28.5 ملین ڈالر موصول ہوئے جو کہ 128.9 ملین ڈالر کی مجموعی غیر ملکی براہ راست سرمایہ کاری کا 22.12 فیصد بنتا ہے۔ جولائی 2022 سے مئی 2023 تک پاکستان نے چین سے 374.3 ملین ڈالر کی براہ راست غیر ملکی سرمایہ کاری حاصل کی ۔ مزید برآں پاکستان کو چین سے 0.5 ملین ڈالر فارن پورٹ فولیو انویسٹمنٹ موصول ہوئے جس سے 11 ماہ کی مدت کے دوران مجموعی سرمایہ کاری 374.8 ملین ڈالر تک پہنچ گئی۔

چین کے علاوہ پاکستان نے مئی 2023 میں ہانگ کانگ کے خصوصی انتظامی علاقے سے بھی 13.2 ملین ڈالر کی براہ راست غیر ملکی سرمایہ کاری حاصل کی۔ جولائی 2022 سے مئی 2023 تک ہانگ کانگ سے اس مد میں90ملین ڈالر آئے۔جولائی تا مئی مالی سال 2023 کی مدت کے دوران پاکستان میں مجموعی براہ راست غیر ملکی سرمایہ کاری کا حجم1.32 بلین ڈالر رہاجس کا 28.4 فیصد چین سے آیا۔