اسلام آباد (این این آئی)چیئرمین تحریکِ انصاف سے ملاقات کیلئے گزشتہ شام جب وائس چیئرمین پی ٹی آئی شاہ محمود قریشی آئے تو بہت فریش تھے، میڈیا سے گفتگو کا کہہ کر گئے۔

ملاقات سے واپسی پر شاہ محمود قریشی کا چہرا اترا ہوا، اعصاب تنے ہوئے تھے، ان کا موبائل دوسرے رو ز بھی بند جارہا تھا ۔ذرائع کے مطابق چیئرمین تحریکِ انصاف نے ملاقات والے کمرے میں شاہ محمود قریشی سے ملاقات نہیں کی بلکہ یہ ملاقات ویڈیو ریکارڈنگ روم میں کی۔ذرائع کے مطابق شاہ محمود قریشی نے چیئرمین پی ٹی آئی سے کہا کہ ہزاروں ورکرز پکڑے گئے ہیں ان کے لیے کوششیں کرنی چاہئیں۔شاہ محمود قریشی نے ورکرز کو ریلیف دلوانے کے لیے پالیسی بنانے پر بھی زور دیا۔چیئرمین پی ٹی آئی سے شاہ محمود قریشی نے کہا کہ پارٹی کو دوبارہ سسٹم میں لانے کے لیے سخت فیصلے کرنے ہوں گے۔ذرائع نے کہا کہ دونوں رہنمائوں نے کچھ دیر لان میں واک کے دوران بھی گفت گو کی۔ذرائع نے بتایا کہ آخری اطلاعات تک ملاقات کے بعد سے شاہ محمود قریشی کا موبائل فون مسلسل بند جارہا تھا ۔