دبئی (این این آئی)انٹرنیشنل کرکٹ کونسل (آئی سی سی)نے کیچ کے لیے امپائرز کی جانب سے دیے جانے والے سافٹ سگنل کے متنازع قانون کو ختم کرنے کے ساتھ ساتھ وکٹوں کے قریب کھڑے ہونے والے وکٹ کیپرز کے لیے ہیلمٹ کا استعمال بھی لازمی قرار دے دیا ہے۔میڈیا رپورٹ کے مطابق آئی سی سی کی ترمیم شدہ پلیئنگ کنڈیشنز کے مطابق اب کیچز کے حوالے سے کسی بھی قسم کے شکوک و شبہات کی صورت میں امپائرز آٹ یا ناٹ آٹ کا سافٹ سگنل دینے کے بجائے حتمی فیصلے سے قبل معاملہ براہ راست ٹی وی امپائر کے سپرد کردیں گے۔

اس تبدیلی کی تجویز آئی سی سی کی مینز کرکٹ کمیٹی نے دی تھی جس کی ویمنز کرکٹ کمیٹی اور آئی سی سی کی چیف ایگزیکٹو کمیٹی نے بھی منظوری دے دی ہے۔سافٹ سگنل کے قانون کو انڈین پریمیئر لیگ میں دو سال قبل 2021 میں ہی ختم کردیا گیا تھا لیکن انٹرنیشنل کرکٹ میں اس کا استعمال جاری تھا۔یہ قانون ایک عرصے سے متنازع بنا ہوا تھا کیونکہ فیلڈ امپائر کی جانب سے سافٹ سگنل دیے جانے کے بعد کوئی نتیجہ خیز ری پلے میسر نہ ہونے کے باوجود تھرڈ امپائر فیلڈ امپائر کے فیصلے کو برقرار رکھتے تھے جس کی وجہ سے متعدد فیصلوں پر سوالات بھی اٹھائے گئے اور انگلینڈ کے کپتان بین اسٹوکس نے بھی اس کو ختم کرنے کا مطالبہ کیا تھا۔آئی سی سی کی مینز کرکٹ کمیٹی کے سربراہ سارو گنگولی نے کہا کہ کمیٹی انتہائی سنجیدگی سے جائزہ لینے کے بعد فیصلہ کیا کہ سافٹ سگنل غیر ضروری ہے اور بعض اوقات کیچز کے معاملے میں مزید ابہام پیدا کرنے کا سبب بنتے ہیں۔اس کے علاوہ پلیئنگ کنڈیشنز میں ایک اور تبدیلی بھی کی گئی ہے اور ان کھلاڑیوں کے لیے ہیلمٹ پہننا لازمی ہوگا جن کے گیند لگنے کی صورت میں زخمی ہونے کا زیادہ امکان ہے۔اس طرح فاسٹ بالرز کا سامنا کرنے والے بیٹسمین اور اسپنرز پر وکٹوں کے قریب کھڑے ہونے والے وکٹ کیپر کے ساتھ ساتھ بلے باز کے قریب فیلڈنگ کرنے والوں کو بھی لازمی ہیلمٹ پہننا ہو گا۔